എന്റെ കുത്തിവരകള്‍

ഈദ് ആശംസകള്‍..

2011-08-29T20:18:00.003+05:30

എല്ലാവര്‍ക്കും സ്നേഹം നിറഞ്ഞ ഈദ് ആശംസകള്‍....

പുനര്‍ജ്ജനി

2011-05-07T12:15:00.007+05:30

ഇന്ന് മാങ്ങ പെറുക്കാന്‍ പോയപ്പോള്‍ വല്ല്യുമ്മ ഞങ്ങളോട് പറഞ്ഞു,”കുട്ടികളേ,ഞാന്‍ നിങ്ങള്‍ക്കൊരു പാട്ടുപാടിത്തരാം.” പുനര്‍ജ്ജനി (1948-49 കാലത്ത് അരീക്കോട് ജി.എം.യു.പി.സ്കൂളില്‍ ഒരു വാര്‍ഷിക ദിനത്തില്‍ വല്ല്യുമ്മ അവതരിപ്പിച്ച ആംഗ്യപ്പാട്ട്.)
പോരിന്‍ ചങ്ങാതിമാര്‍കളേ വേഗം-
പോവാം നമ്മള്‍ക്കാ മാവിന്‍ചുവട്ടില്‍
തേനൊഴുകുന്ന മാങ്ങകളല്ലേ-
തേനേന്മാവില്‍ നിന്നങ്ങുതിരുന്നു
ഉച്ചതെന്നലാ മാവിന്‍ കൊമ്പെല്ലാം
മെച്ചമോടെ കുലുക്കുന്നു മെല്ലെ
മാങ്ങയൊന്നതാ വീഴുന്നു ദൂരെ
മാങ്ങയൊന്നിതാ വീഴുന്നു ചാരെ
അണ്ണാരക്കണ്ണനാ മാങ്ങകളെല്ലാം
എണ്ണിയെണ്ണി നടക്കുന്ന പോലെ
ഓടി നമ്മള്‍ക്കു മാങ്ങ പെറുക്കാം
പാടിയാടി നമുക്കു രസിക്കാം
(പോരിന്‍.....)

തുഞ്ചന്‍പറമ്പ് ബ്ലോഗ്മീറ്റ് കവിതയിലൂടെ

2011-04-24T21:27:00.003+05:30

തുഞ്ചന്‍പറമ്പില്‍ ഒത്തുചേര്‍ന്നല്ലോ
മലയാളമണ്ണിലെ ബൂലോകര്‍
അനുഭവങ്ങള്‍ പങ്കുവച്ചീടാന്‍
ഓരോരുത്തരായ് വരവായി

മീറ്റ് പൊലിപ്പിക്കാന്‍ നെട്ടോട്ടമോടുന്നു
കൊണ്ടോട്ടിക്കാരന്‍ കൊട്ടോട്ടിക്ക
കൂതറയെന്നൊരു പേരുണ്ടെങ്കിലും
കൂതറയല്ലാത്ത ഹാഷിംക്ക

കാരിക്കേച്ചറുകള്‍ കുത്തിവരക്കുവാന്‍
സജീവ് എന്നൊരു തടിയന്‍ മാമന്‍
മാറാത്ത രോഗത്തെ പടിപ്പുറത്താക്കി
റഹ്മത്തുന്നീസ എന്ന നിസത്താത്ത

വികിപീഡിയ തന്‍ നല്ലൊരറിവുമായ്
വന്നല്ലോ പ്രിയമുള്ള ഹബീബിക്ക
ബ്ലോഗിന്‍ ഹരിശ്രീ കുറിക്കുന്നത് ചൊല്ലീ
വി.കെ അബ്ദു എന്ന വല്ല്യുപ്പാപ്പ

മുഖ്യനെ തോല്‍പ്പിക്കാന്‍ മുമ്പിട്ടിറങ്ങിയ
വമ്പില്ലാ ചേച്ചി ലതിച്ചേച്ചി
അക്ഷരമറിഞ്ഞിട്ടും നിരക്ഷരനായി
തുഞ്ചന്‍പറമ്പിലൊരു ജുബ്ബാചേട്ടന്‍

കോയമാരുടെ കോഴിക്കോട്ടീന്ന്
പലഹാരങ്ങളുമായി ഐസീബിത്ത
തിളങ്ങും തലയുമായ് ബൂലോകത്ത് മിന്നും
എന്‍ പൊന്നുപ്പച്ചി അരീക്കോടന്‍

മീറ്റിലെ കുട്ടി ഞാന്‍ കുത്തിവരക്കാരി
പത്രത്തില്‍ പടം വന്ന പത്രാസുകാരി
പച്ചടി കിച്ചടി അവിയലും കൂട്ടീ
കെങ്കേമ സദ്യയും അട പ്രഥമനും

ചൊല്ലിയാല്‍ തീരാത്ത അത്രയും ബ്ലോഗര്‍മാര്‍
ചൊല്ലിയാല്‍ തീരാത്ത അത്രയും വിശേഷങ്ങള്‍
എല്ലാരും കൂടിയപ്പോള്‍ ആഘോഷമായി
തുഞ്ചന്‍പറമ്പെന്റെ മനം കവര്‍ന്നു.

തുഞ്ചന്‍ പറമ്പിലെ പത്രാസുകാരി!

2011-04-19T20:26:00.005+05:30

പത്രത്തിലൊക്കെ പേരു വന്ന പത്രാസുകാരി എന്ന് പാവത്താന്‍ ചേട്ടന്‍ പറയുന്നതിന് മുമ്പേ ഉപ്പച്ചി എന്നോട് ആ വിവരം പറഞ്ഞിരുന്നു.പക്ഷേ കേരള കൌമുദിയില്‍ എന്റെ ഫോട്ടൊ വന്നത് റഫീക്ക്ക്കയുടെ പോസ്റ്റ് കണ്ടപ്പോഴാണ്.ഇതാ എന്റെ പേര് വന്ന മനോരമ പത്രത്താളും കൌമുദി പത്രത്താളും ആ പോസ്റ്റില്‍ നിന്നും എടുത്തത്.അപ്രതീക്ഷിതമായി മീറ്റില്‍ എത്തിയ എനിക്കാണല്ലോ ആ ഭാഗ്യം എന്നതില്‍ ഞാന്‍ ദൈവത്തെ സ്തുതിക്കുന്നു.

ഞാനും തുഞ്ചന്‍പറമ്പിലെത്തി...

2011-04-17T22:28:00.005+05:30

ഇന്ന് തുഞ്ചന്‍പറമ്പില്‍ നടന്ന ബ്ലോഗേഴ്സ് മീറ്റിങ്ങില്‍ എന്റെ ഉപ്പയുടേയും അനിയത്തിയുടേയും കൂടെ ഞാനും പങ്കെടുത്തു. പല മുതിര്‍ന്ന ബ്ലോഗേഴ്സിനേയും നേരിട്ട് കാണാന്‍ എനിക്ക് വീണ്ടും അവസരം ലഭിച്ചു.ചെറായി ബ്ലോഗേഴ്സ് മീറ്റിങ്ങിനു ശേഷം ബ്ലോഗറായ ഞാന്‍ പങ്കെടുക്കുന്ന ആദ്യത്തെ ബ്ലോഗ് മീറ്റിങ്ങാണിത്‌.നിയമസഭാ ഇലക്ഷനില്‍ മുഖ്യമന്ത്രി വി.എസ്.അച്ചുതാനന്ദനെതിരെ മത്സരിച്ച ലതിക ചേച്ചി അന്നത്തെ സൌഹൃദം പുതുക്കിയപ്പോള്‍ എനിക്കത് വല്ലാത്ത ഒരു അനുഭവമായി.കൂടാതെ എന്റെ ബ്ലോഗിനെ ഇന്‍ഫോമാധ്യമത്തിലൂടെ പരിചയപ്പെടുത്തിയ ,എന്റെ ഉപ്പാപ്പയുടെ പ്രായമുള്ള വി.കെ.അബ്ദു സാഹിബിനെ നേരിട്ട് കണ്ടതും വലിയ ഒരു അനുഭവമായി. (തുഞ്ചന്‍പറമ്പിനെക്കുറിച്ച്, മുമ്പ് എന്റെ തന്നെ മറ്റൊരു പോസ്റ്റില്‍ എഴുതിയിരുന്നതിനാല്‍ വീണ്ടും എഴുതുന്നില്ല)

ജൂണ്‍ 20,വായനാദിനം

2010-06-20T07:06:00.003+05:30

ജൂണ്‍ 20,വായനാദിനം.

ഇന്നലെ വായനാദിനമായിരുന്നു എന്ന് എല്ലാവര്‍ക്കുമറിയില്ലേ? സ്കൂളുകളിലും വായനാമത്സരങ്ങളും ഉണ്ടാവും അല്ലേ? സര്‍ദാര്‍ കെ.എം പണിക്കരുടെ ജന്മദിനമാണല്ലോ അത്?

നിങ്ങളുടെ നാട്ടിലെ സ്കൂളുകളിലും എന്തെല്ലാം പരിപാടികള്‍ ഉണ്ടായിരുന്നു?

എന്നാല്‍ എന്റെ സ്കൂളിലും പരിപാടികള്‍ ഉണ്ടായിരുന്നു.ഞാന്‍ വായനാമത്സരതിന്റെ ഫസ്റ്റ് റൌണ്ടില്‍ പങ്കെടുത്തു.ഹിന്ദി,മലയാളം എന്നീ വിഷയങ്ങള്‍ക്കാണ്‍് പങ്കെടുത്തത്.എന്നെ ഫൈനല്‍ മത്സരത്തിന് സെലെക്റ്റ് ചെയ്തു.എന്റെ വിജയത്തിനു വേണ്ടി എല്ലാവരോടും പ്രാര്‍ത്ഥിക്കാന്‍ അഭ്യര്‍ത്ഥിക്കുന്നു.

എന്റെ പ്രഥമ പഠനയാത്ര - അവസാന ഭാഗം

2010-03-27T10:33:00.026+05:30

നിളയുടെ കഥ കേട്ട ശേഷം ഞങ്ങള്‍ പോയത്‌ നൂര്‍ തടാകത്തിലേക്കാണ്‌.

അവിടെ കണ്ട നെല്ലിമരത്തില്‍ വാനരനെപ്പോലെ ശംസുകാക്ക ചാടിക്കയറി.പിന്നാലെ ഞങ്ങളും,ഒരൊറ്റ നെല്ലിക്കപോലുമില്ലാത്തതിനാല്‍ എല്ലാവരും കയറിയതിലും വേഗത്തില്‍ ചാടിയിറങ്ങി.

തടാകത്തില്‍ ബോട്ടിങ്ങ്‌ ഉണ്ടായിരുന്നെങ്കിലും ഞങ്ങള്‍ കയറിയില്ല.നൂര്‍ തടാകത്തില്‍ പ്രകാശം പരത്തുന്ന വെള്ളാമ്പലുകളും പച്ചപ്പായലുകളും എന്നെ വളരെയധികം ആകര്‍ഷിച്ചു.

തടാകത്തിന്‌ സമീപത്തായി കല്ലില്‍ കൊത്തിവെച്ച രാജസിംഹാസനവും, മേശ,ബെഞ്ച്‌,എന്നിവയും ഉണ്ടായിരുന്നു.സിംഹാസനത്തില്‍ ഇരിക്കുന്നതിന്റെ സുഖമറിയാന്‍ ഞാന്‍ അതില്‍പ്പോയി ഇരുന്നുനോക്കി.കല്ലുകൊണ്ടായതിനാല്‍ ഒരു സുഖവും തോന്നിയില്ല.

ഈ പിക്‌നിക്കിലെ ഞങ്ങളുടെ അവസാന സന്ദര്‍ശനസ്ഥലം ഒരഴിമുഖമായിരുന്നു.ഭാരതപ്പുഴ അറബിക്കടലില്‍ ലയിച്ച്‌ ചേരുന്ന കൂട്ടായി അഴിമുഖം.

അവിടെ കണ്ട, മനുഷ്യരെപ്പോലെ ബസ്‌ അടക്കമുള്ള വാഹനങ്ങളും കയറ്റിക്കൊണ്ടുപോകുന്ന ജങ്കാര്‍ ഞങ്ങള്‍ക്കൊരല്‍ഭുതക്കാഴ്ച്ച തന്നെയായിരുന്നു.ഞങ്ങളെല്ലാവരും ജങ്കാറില്‍ കയറി യാത്രചെയ്തു.

തിരികെ വന്നപ്പോള്‍, ടെലിവിഷന്‍ പ്രോഗ്രാമായ സിനിമാല താരം ഷാജു കൊടിയനെയും സംഘത്തെയും കണ്ടു.

അദ്ദേഹത്തിന്റെ ഓട്ടോഗ്രാഫ്‌ വാങ്ങാന്‍ എല്ലാവരും തിക്കിത്തിരക്കി.ഞാനും ഓട്ടോഗ്രാഫ്‌ വാങ്ങിയിരുന്നെങ്കിലും അത്‌ മറ്റാരോ കൈക്കലാക്കിയിരുന്നു.

വൈകിട്ട്‌ അഞ്ച്‌ മണിയോടെ ഞങ്ങളുടെ മടക്കയാത്ര ആരംഭിച്ചു.

പിക്‌നിക്‌ അവസാനിക്കുന്നതിന്റെ പാട്ടിലും കളിയിലും മുഴുകി രാത്രി 8:30-ഓടെ വീട്ടില്‍ തിരിച്ചെത്തുമ്പോള്‍ ഒരു ടൂറിന്റെ എല്ലാ രസങ്ങളും അനുഭവിച്ചുകഴിഞ്ഞിരുന്നു.ഇത്രയും നല്ല ഒരു പിക്‌നിക്‌ സംഘടിപ്പിച്ച എന്റെ വാദിറഹ്മ ഇംഗ്ലീഷ്‌ സ്കൂള്‍ ലിറ്റററി ക്ലബ്ബിന്‌ എല്ലാ അഭിനന്ദനങ്ങളും,ആശംസകളും നേരുന്നു.

ഇനി അല്‍പം ചിത്രങ്ങള്‍ ആകാം അല്ലേ?

എനിക്ക് ഒരു കുഞ്ഞനിയത്തികൂടി...

2010-03-19T20:29:00.002+05:30

ഇന്നലെ എനിക്ക് ഒരു കുഞ്ഞനിയത്തി കൂടി പിറന്നു.

എന്റെ പേര് ലുലു.

അനിയത്തിയുടെ പേര് ലുഅ.

അപ്പോള്‍ ഈ കുഞ്ഞനിയത്തിയുടെ പേരോ?

എന്റെ പ്രഥമ പഠനയാത്ര - ഭാഗം രണ്ട്‌

2010-03-16T14:29:00.015+05:30

ഞങ്ങളുടെ അടുത്ത ലക്ഷ്യസ്ഥാനം തിരൂരായിരുന്നു.പാട്ടും കളിയുമായി തിരൂരിലെത്തിയത്‌ ഞങ്ങള്‍ അറിഞ്ഞതേയില്ല.

തിരൂരില്‍ ഞങ്ങള്‍ ആദ്യമായി സന്ദര്‍ശിച്ചത്‌ 1921-ലെ മലബാര്‍ കലാപത്തിന്റെ ഭാഗമായി സംഭവിച്ച വാഗണ്‍ ട്രാജഡി എന്ന കുപ്രസിദ്ധ സംഭവത്തില്‍ മൃത്യുവരിച്ച ധീരദേശാഭിമാനികളുടെ മയ്യിത്ത്‌ ഖബറടക്കം ചെയ്ത കോരത്ത്‌ പള്ളിയായിരുന്നു.

പ്രത്യേകം വേര്‍തിരിക്കപ്പെട്ട ആ ഖബറുകള്‍ ഞങ്ങളില്‍ സ്വാതന്ത്ര്യ സമര ചിന്തകള്‍ ഉണര്‍ത്തി.വളര്‍ന്നു നില്‍ക്കുന്ന ഒരു കാട്ടുചന്ദനച്ചെടി വിനോദ്‌ സാര്‍ ഞങ്ങള്‍ക്കവിടെ വെച്ച്‌ കാണിച്ചുതന്നു.

മലയാളഭാഷയുടെ പിതാവായ തുഞ്ചത്ത്‌ എഴുത്തച്ചന്റെ കേന്ദ്രമായിരുന്ന തുഞ്ചന്‍പറമ്പിലേക്കാണ്‌ പിന്നീട്‌ ഞങ്ങള്‍ പോയത്‌.

തുഞ്ചത്ത്‌ എഴുത്തച്ചന്‍ ഉപയോഗിച്ച എഴുത്താണി, എഴുത്തോല എന്നിവയും ,ആചാര്യന്റെ സന്തതസഹചാരിയായിരുന്ന ശാരിക പൈതല്‍ എന്ന തത്തയുടെ പ്രതിരൂപവും ഞങ്ങള്‍ സന്ദര്‍ശിച്ചു.

എഴുത്തച്ചന്‍ കുട്ടികളെ എഴുത്തിനിരുത്തിയിരുന്ന സരസ്വതീ മണ്ഡപവും അദ്ദേഹത്തിന്റെ താമസസ്ഥലവും കുളിച്ചിരുന്ന കുളവും ഞങ്ങള്‍ സന്ദര്‍ശിച്ചു.ബുദ്ധിയുള്ളവര്‍ക്ക്‌ മധുരിക്കുകയും ബുദ്ധിയില്ലാത്തവര്‍ക്ക്‌ കയ്ക്കുകയും ചെയ്യുമെന്ന്‌ വിനോദ്‌ സാര്‍ പറഞ്ഞ കാഞ്ഞിരത്തിന്റെ ഇല തിന്ന്‌ ഞങ്ങളെല്ലാവരും ഒരു ബുദ്ധിപരീക്ഷ നടത്തി വിഷണ്ണരായി.

ശേഷം ഞങ്ങള്‍ തുഞ്ചന്‍ സ്മാരക മലയാള സാഹിത്യ മ്യൂസിയം കാണാന്‍ പോയി.തുഞ്ചത്തെഴുത്തച്ചന്റെ കടുംബ ചരിത്രവും.അദ്ദേഹം ഉപയോഗിച്ചിരുന്ന സാധന സാമഗ്രികളും വിവിധ കേരളീയ കലകളായ ചാക്യാര്‍കൂത്ത്‌,കൂടിയാട്ടം,കഥകളി,ഓട്ടംതുള്ളല്‍ എന്നിവയുടെ വീഡിയോ പ്രദര്‍ശനവും കണ്ടു.കൂടാതെ മലയാളസാഹിത്യത്തിലെ വിവിധ സാഹിത്യകാരന്മാരുടെ ജീവചരിത്രക്കുറിപ്പുകളും അവിടെ പ്രദര്‍ശിപ്പിച്ചിരുന്നു.

മലയാള സാഹിത്യത്തിന്റെ വിവിധ ശാഖകളില്‍ അനിഷേധ്യ സ്ഥാനം വഹിക്കുന്ന നിളാ നദിയെപ്പെറ്റിയുള്ള "നിള പറയുന്നു" എന്ന ഡോക്യുമെന്ററി ഫിലിമും ഞങ്ങള്‍ കണ്ടു.മനുഷ്യന്‍ പ്രകൃതിയെ കടന്നാക്രമിക്കുന്നതിന്റെവിവിധ ദൃശ്യങ്ങള്‍ ഞങ്ങളുടെ കുഞ്ഞുമനസ്സുകളെപ്പോലും വേദനിപ്പിച്ചു.

ഇനി അല്‍പം ചിത്രങ്ങള്‍ ആകാം അല്ലേ?

(തുടരും)

എന്റെ പ്രഥമ പഠനയാത്ര - ഒന്നാം ഭാഗം

2010-03-07T12:08:00.016+05:30

2009 ഡിസം:6ന്‌ പതിവിലും നേരത്തെ ഞാനുറക്കമുണര്‍ന്നു.സ്കൂള്‍ ലിറ്റററി ക്ലബ്ബിന്റെ തിരൂരിലേക്കുള്ള പഠനയാത്ര അന്നായിരുന്നു.പ്രഭാതകൃത്യങ്ങള്‍ പെട്ടെന്ന്‌ ചെയ്ത്‌ തീര്‍ത്ത്‌ പ്രാതലും കഴിച്ച്‌ "ഫന്റാസ്റ്റിക്കും" കാത്ത്‌ ഞാന്‍ ഉപ്പയുടെ കൂടെ അരീക്കോട്‌ അങ്ങാടിയില്‍ നിന്നു.സഹപാഠികളായ സനയും സിദാനും എനിക്കു മുമ്പേ അവിടെ എത്തിയിരുന്നു. 7:15ന്‌തന്നെ ഞങ്ങള്‍ കാത്തുനില്‍പ്‌ ആരംഭിച്ചിരുന്നു.7:30 ആയിട്ടും ബസ്‌ വരാതായപ്പോള്‍ മനസ്സില്‍ ചില ആധികള്‍ പരന്നുതുടങ്ങി.കൃത്യം 7:45ന്‌വാദിറഹ്മയുടെ സ്വന്തം "ഫന്റാസ്റ്റിക്ക്‌" ബസ്‌ (ഞങ്ങളുടെ സ്കൂള്‍ ബസ് തന്നെ) അരീക്കോട്‌ അങ്ങാടിയില്‍ പ്രത്യക്ഷപ്പെട്ടു.

അരീക്കോട്‌ പെരുമ്പറമ്പ്‌ കുംഭാരകോളനിയായിരുന്നു ഞങ്ങളുടെ ആദ്യ സന്ദര്‍ശന സ്ഥലം.

മണ്ണുകൊണ്ട്‌ കൗതുകങ്ങള്‍ വിരിയിക്കുന്ന കുലാലചക്രം കറങ്ങുമ്പോള്‍ കുംഭാരമനസ്സിലെ ആശയങ്ങള്‍ വിവിധ പാത്രങ്ങളായി രൂപപ്പെടുന്നത്‌ ഞങ്ങള്‍ അല്‍ഭുതത്തോടെ നോക്കി നിന്നു.

കുലാലചക്രത്തില്‍ പിടിപ്പിച്ച മണ്ണ്‍ കുശവന്റെ കൈ വെപ്പിനനുസരിച്ച്‌ ഉയര്‍ന്നുപൊങ്ങി കലമാവുന്ന കാഴ്ച്ച വിസ്മയാവഹം തന്നെ.

എനിക്കും അനിയത്തിക്കും കളിക്കാനായി രണ്ട്‌ കുഞ്ഞുചട്ടികളും ഞാന്‍ അവിടെനിന്ന് വാങ്ങി.

കുംഭാരകോളനിയില്‍ നിന്നുള്ള മറ്റു ചില ദൃശ്യങ്ങള്‍ കൂടി നിങ്ങള്‍ക്കായി താഴെ ചേര്‍ക്കുന്നു.

ഒരു സന്തോഷ വാര്‍ത്ത കൂടി

2010-02-16T15:41:00.002+05:30

ഒന്നാം ക്ലാസ്സില്‍ പഠിക്കുന്ന എന്റെ അനിയത്തി ആതിഫ ജും‌ലക്ക് ഈ വര്‍ഷത്തെ ഗുരു ശിഷ്യ സ്കോളര്‍ഷിപ്പ് ലഭിച്ചു.എ+ ഗ്രേഡും സംസ്ഥാനത്ത് പതിനാലാം റാങ്കും ആണ് ലഭിച്ചത്.എനിക്കും ഒന്ന്,മൂന്ന്,നാല് ക്ലാസുകളില്‍ ഈ സ്കോളര്‍ഷിപ്പും രണ്ട്,മൂന്ന്,നാല് ക്ലാസുകളില്‍ പി.സി.എം സ്കോളര്‍ഷിപ്പും ലഭിച്ചിരുന്നു.ഈ വര്‍ഷം എന്റെ സ്കൂളില്‍ ഈ രണ്ട് സ്കോളര്‍ഷിപ്പ് പരീക്ഷകളും ഇല്ലാത്തതിനാല്‍ എഴുതാന്‍ പറ്റിയില്ല.മജ്‌ലിസ് സ്കോളര്‍ഷിപ്പ് പരീക്ഷ എഴുതിയിരുന്നു, കിട്ടിയില്ല.

പുതുവത്സരാശംസകള്‍

2009-12-31T22:20:00.002+05:30

ബലിപെരുന്നാള്‍ ആശംസകള്‍

2009-11-26T21:03:00.004+05:30

ബൂലോകര്‍ക്കെല്ലാം ഞങ്ങളുടെ ബലിപെരുന്നാള്‍ ആശംസകള്‍.

ബൂലോകത്തെ എന്റെ ആദ്യ ദീപാവലി....

2009-10-16T20:21:00.001+05:30

ഞാന്‍ മൂന്നാം ക്ലാസ്സിലെ സമ്മര്‍ വെക്കേഷന്‍ ആസ്വദിക്കുമ്പോള്‍ ഉപ്പച്ചി എന്നെക്കൊണ്ട് ചെയ്യിപ്പിച്ച ഒരു പണി....ഏതോ കുടുംബമാധ്യമത്തില്‍ വന്ന ചിത്രം ഞാന്‍ കുത്തിവരച്ചപ്പോള്‍......

ഒരു സന്തോഷ വാര്‍ത്ത ...

2009-10-01T20:59:00.002+05:30

കുറ്റിക്കാട്ടൂര്‍ ബീ ലൈന്‍ പബ്ലിക് സ്കൂളില്‍ വച്ച് നടന്ന സഹോദയ സ്കൂള്‍ കോം‌പ്ലെക്സ് മലബാര്‍ റീജ്യന്‍ കലോത്സവത്തില്‍ എനിക്ക് സംസ്കൃത പദ്യം ചൊല്ലലില്‍ ബി ഗ്രേഡ് ലഭിച്ചു.ആദ്യമായാണ് ഞാന്‍ സംസ്കൃത പദ്യംചൊല്ലുന്നത്.

ഈദാശംസകള്‍.

2009-09-19T21:51:00.003+05:30

എല്ലാവര്‍ക്കും എന്റെയും അനിയത്തി ലുവയുടേയും ഹൃദ്യമായ ഈദാശംസകള്‍.

കുത്തിവര ഒന്നാം ലക്കം

2009-09-05T17:31:00.000+05:30

MS Paint-ല്‍ എന്റെ ഒരു പരീക്ഷണം.ഇത്‌ ചെറായി മീറ്റില്‍ വച്ച്‌ എന്റെയും അനിയത്തിയുടേയും കാരിക്കേച്ചര്‍ വരച്ച സജീവേട്ടന്‌....

എന്റെ കുത്തിവരകള്‍

2009-09-05T17:14:00.000+05:30

ചെറായി മീറ്റില്‍ നിന്നും ആവേശം പൂണ്ട്‌ ഞാനും ബൂലോകത്തേക്ക്‌.പോസ്റ്റുകള്‍ താമസിയാതെ......